ROXAS CITY – Epektibo sa Domingo nga adlaw Abril 5, 2020 suspendido na ang market day sa Teodoro Arcenas Trade Center (TATC).
Ginpahayag ni Mrs. Heloise Mendoza, market administrator nga mangin kasubong na lamang sa ordinaryo nga adlaw ang Domingo, agud malikawan ang paglapta sang COVID-19.
Suspendido man ang pagbaligya sang mga ukay ukay ukon relipan sa merkado publiko nga na-obserbahan ginatumpukan man sang madamo nga mga tawo.
Indi man madulaan sang palangabuy-anan ang mga negosyante apisar pa nga suspendido na ang market day tagsa ka Domingo nga adlaw, bangud mahimo nila nga ipakompra ang ginabaligya nga produkto sa mga negosyante sa syudad agud may sarang mabakal ang mga kunsumidor.
Ginhinyo man sang opisyal sa mga pumuluyo nga isa lamang ka miyembro sa ila balay ang manindahan ukon mahimo man nga magpadala na lamang sa ila mga tupad balay nga magapanindaha.
Ginkumpirma man ni Mendoza ang padayon nga operasyon sang mga karinderya sa TATC, apang gin-athag nga for take out lamang ini kag wala ginapahangutan nga makapakaon sila.
Samtang gintuad sang opisyal ang istrikto nga pagpatuman sang 10 person to enter sa merkado publiko, sa diin katuyuan sini nga masunod ang social distancing..
Nagpangabay man ini sa makasulod na sa merkado kag magapanindahan nga kun mahimo magdiretso na sa ila pagpamalaklon kag likawan ang anuman nga delay, bangud madamo pa ang nagahulat sa guwa para magpanindahan man sang ila kinahanglanon sa balay.
Sa katapusan naghinyo sang kooperasyon sang publiko si Mendoza sa diin wala sang malain kun mangin matinumanon sa pagsulundan sang gobyerno bangud ang ila ginahimo para sa kaayuhan sang tanan.
