Padayon ang pag-construct sang mas daku nga drainage system sa Brgy. Culasi, Roxas City, agud masolbar kag mabuhinan ang problema sang mga pumuluyo sa pagbaha, ilabi na kon mabaskog ang ulan.
Sa interview sang Bombo Radyo kay Engr. Lenard Vega sang City Engineer’s Office, iya ginpahayag nga yara na sa 60% tubtob 70% ang natapos sa pag-construct sang drainage system sa nasambit nga barangay.
Suno sa iya, nagsugod ang construction sang drainage system sang bulan sang Setyembre kag ginapaabot nga matapos ini sa bulan sang Disyembre. Apang, magadepende gihapon ang pag-uswag sang proyekto sa maayo nga koordinasyon sang mga pumuluyo.
Pahayag pa niya, maayo ang kooperasyon sang mga residente kag sang iban nga mga tawo nga naga-partisipar sa pag-construct sang drainage system, gani mas madasig ang pag-uswag sang proyekto.
Dugang pa ni Vega, indi man delikado ang lugar kun sa diin gina construct ang drainage system. Nagakordinar man sila sa mga opisyal sang barangay agud malikawan ang bisan ano nga insidente, bangod may mga balay malapit sa lugar.
May ginpreparar man sila nga bahin sang dalan kun sa diin safe nga alagyan sang mga tawo samtang ginahimo ang drainage system.
Sa karon, ginpahayag sang natungdan nga padayon ang panikasog sang City Government sa pagpangita sang paagi agud masolbar ang problema sang pagbaha sa Brgy. Culasi, ilabi na sa tion nga mabaskog ang ulan.
