Nagapadayon ang konstruksyon sang bag-o nga drainage system sa Brgy. Tiza Roxas City bilang kabahin sang long-term flood mitigation program sang City Government.
Samtang ginahimo ang proyekto, nakita sang mga engineer ang isa sa nagapanguna nga rason sang masami nga pagbaha sa lugar. Suno sa ila, gamay gid ang buho sang existing nga drainage, gani indi na ini makasarang sa madamo nga volume sang tubig ilabi na kon nagabunok ang ulan.
Bangud sini, ginapaobra ang mas daku kag mas lapad nga drainage system nga may inside dimension nga 2 metros ang kalaparon kag 2.5 metros ang kataason.
Suno sa City Government, mas mataas pa ini sa isa ka tawo kag mga anum ka pilo ang kadakuon kumpara sa daan nga drainage.
Ginalauman nga paagi sa bag-o nga imprastruktura, mas mapadasig ang pag-agi sang tubig kag makapahagan-hagan sang pagbaha sa Brgy. Tiza sa tion sang mabaskog nga pag-ulan.
Ang proyekto kabahin sang padayon nga tikang sang City Government agud makahatag sang long-term solution sa problema sang baha sa lugar.
