Ginaduso sang Department of Agriculture (DA) ang mas mataas nga taripa sa pila ka mga imported nga produkto sang karne pagkatapos nga magsobra ini sa gintalana nga kadamuon sang import.
Sa idalom sang Department Order No. 24, ginmando ni Agriculture Secretary Francisco Tiu Laurel Jr. ang pagpatuman sang volume-based Special Safeguard (SSG) duties sa pila ka sahi sang imported nga karne agud maprotektahan ang local producers.
Suno sa DA, ang amo nga mga produkto nagsobra sa mga trigger volume thresholds, gani kinahanglan ang dugang nga mga taripa agud maprotektahan ang lokal nga industriya sang kasapatan.
Base sa data sang Bureau of Animal Industry, nagtaas sang 12 porsyento ang importasyon sang karne sang pungsod sa una nga katunga sang tuig, halin sa 778,100 metric tons sang nagligad nga tuig tubtob sa 872,274 metric tons subong nga tuig.
