ROXAS CITY – Indi pa matumod sang Land Transportation Franchising and Regulatory Board (LTFRB) – Region VI kun san-o ang releasing sang fuel subsidy sa bug-os nga Western Visayas.
Sa interview sang Bombo Radyo Atty. Salvador ‘Jun’ Altura Jr., tagpamaba kag Hearing Officer sang LTFRB – Region 6, suno diri una nga semana sang Setyembre naaprubahan na ang pagrelease sang fuel subsidy gani posible nga makabaton na sang ayuda ang mga benepisaryo nga may mga aktibo nga fuel subsidy cards.
Samtang, ginahulat naman ang final list sa mga bag-o kag daan nga aplikante nga nagbalhin sa COOP halin sa operator.
Suno diri, pananglitan makwalipika para sa subsidiya iga-notify man ang ini sang ahensya para sa nagakaigo nga rekisitos nga kinahanglan isumiter.
Pahayag ni Altura, wala siya sang ideya kun san-o ihatag ang fuel subsidy sa mga operators sa Western Visayas ang himuon lang suno diri amu ang pag-contact sa Land Bank of the Philippines sa designated nga lugar.
Mahibaluan ang nasambit nga ayuda ang gin-alokaran sang P3-B sa idalum sang General Appropriation Act of 2023 para sa tanan nga public utility vehicle (PUV) sa bug-os nga pungsod.
Ginpangabay man sini ang mga benepisaryo nga ang nasambit nga assistance ang para sa inugbakal sang produktong petrolyo.
Tinutuyo sang sudsidiya nga makabulig sa mga drivers kag operators nga mapahagan-hagan ang ila problema sa pihak sang nagatinaas nga presyo.
Nahibaluan nga ang operators sang modernized jeepneys kag Utility Vehicle Express ang makabaton sang P10,000.
Samtang ang mga operators naman sang traditional jeepneys, shuttle services, taxis, tourist transport services, school transport services kag transportation network vehicle services ang makabaton sang P6,500.
Ang mga delivery service riders ang makabaton sang P1,200 nga fuel subsidy kag P1,000 naman sa mga tricycle drivers.
