ROXAS CITY – Nakalinyada na ang mga aktibidades para sa kapistahan kag selebrasyon sang Tilibyugan Et Sapian 2022 nga may tema “Paghanduraw et Panublion” sumugod Hulyo 21 tubtob Hulyo 26 sa banwa sang Sapian.
Sa interview sang Bombo Radyo kay Atty. Joe Villanueva, Alkalde sang Sapian, ginasiguro sini nga mangin madinalag-on kag masadya ang selebrasyon.
Pila sa mga balantayan nga aktibidades amo ang food festival nga pagahiwaton kada gab-i tubtob matapos ang kapistahan, tradisyunal nga sad-sad tilibyugan, Patubas, SK, DEPED, LGBTQ kag Barangay Night, Kalan-unon Festival, Mayor’s People’s Day ukon libre nga panyaga sa mga pumuluyo kag bisita, fireworks display kag pa-disco.
Dugang sang alkalde nabatyagan sini Ang kauhaw sang mga pumuluyo sa selebrasyon apang magapabilin ang pagpatuman sang minimum health protocols sa tanan nga pagtililipon.
Gina-imbetar man sini ang tanan nga magtambong para masaksihan ang pag-tilibyugan sang mga Sapianon sa amu nga selebrasyon.
