Ginpataas sang House of Representatives ang pondo para sa sektor sang agrikultura sa ₱292.9 bilyon sa House version sang 2026 General Appropriations Bill (GAB) nga may tinutuyo nga pasangkaron ang suporta sa mga mangunguma kag manugpangisda, paayuhon ang rural nga imprastruktura, kag palaparon ang farm mechanization.
Suno kay House Appropriations Chairperson Rep. Mikaela Angela Suansing, nagdugang ang Kamara sang ₱53.8 bilyon sa agriculture cluster bilang kabahin sang pagtuon sa food security kag rural development.
Lakip sa dugang nga pondo ang ₱10 bilyon para sa Presidential Assistance for Farmers and Fisherfolk nga magabenepisyo ang kapin 1.43 milyon nga mga mangunguma kag manugpangisda, kag ₱35.5 bilyon para sa farm-to-market roads kag irigasyon, nga magadala sa kabug-usan nga pondo sini sa ₱74.5 bilyon.
Nag-alokar man ang talatapan sang ₱30 bilyon sa idalum sang Rice Competitiveness Enhancement Fund para sa farm mechanization, ₱1 bilyon para sa crop insurance, ₱2.4 bilyon para sa mga deep-water ports, kag ₱200 milyon para sa pagpatuman sang New Agrarian Emancipation Act.
Dugang pa, tinutuyo sang sini nga pondo amo ang panubuon ang gastos sa produksyon, pagtaas sang ani kag kita sang mga mangunguma, kag pagpalig-on sang sektor sang agrikultura samtang nagapadayon ang bicameral deliberations sa 2026 budget.
