ROXAS CITY – Wala sang kuryente kag lubog sa baha ang mga kabalayan kag apektado ang masobra sa isa ka milyon nga residente, bangud sa paglaslas ni hurricane Ian, sa western coast sang Florida, USA.
Ini ang ginpahayag ni Bombo International Correspondent Raffy Fernando, direkta sa USA, sang mainterview sang Bombo Radyo.
Suno diri, nag-landfall ang hurricane Ian kaina sang udto (EST) sa Florida, nga may kadasigon nga hangin nga naglab-ot sa 155 mph, may kalaparon ini nga ginabulubanta 30 miles kag may kadasigon nga 8 tubtob 9mph, buot silingon, mahinay ang paglandfall ni hurricane Ian.
Ang sentro sang bagyo ang counties sang Sarasota, Naples, Ft. Myers, kag magapadulong sa bahin sang Orlando.
Dugang pa sini, may nagpanalasa man nga tornado sa bahin sang Miami nga ginkawasak sang mga propedad sa amu nga lugar.
Pila sa epekto sang hurricane amu ang storm surge, kun sa diin, naga-awas sang 10 tubtob 18 ka tapak nga taas sang tubig-baha.
Ginalauman nga binilyon ang kahalitan sang nasambit nga hurricane sa nasambit nga estado.
Wala man sang Filipino nga napabalita nga nahalitan sang malain nga panahon bangud natigayon nga maka-evacuate ang mga ini sa ila himata ukon sa evacuation centers antes ang hurricane.
