Patay ang indi magnubo sa 116 ka tawo lakip na pito ka mga bata sa nagapadayon nga hublag-protesta batok sa gobyerno sang Iran, suno sa U.S.-based Human Rights Activists News Agency (Hirana).
Base sa datos sang HIRANA, nagdangat na sa 2,638 ang nadakpan samtang nagapadayon ang protesta sa ika-14 nga adlaw. Ginreport man nga 109 ka katapo sang security forces ang napatay sa tunga sang mga nagaprotesta
Pila man ka mga ospital ang puno na sang mga pasyente bangud sa nagadamo nga mga napilasan nga mga demonstrador.
Isa pa ka ospital ang ginreport man nga madamo sang mga pasyente nga napilasan ang gindala sa ila, ang kalabanan may gunshot injuries sa ulo kag mga mata, apang wala sang bastante nga surgeons sa pagbulong sa tanan nga mga pasyente nga gindala sa ila.
Matandaan nga nagsugod ang protesta sang katapusan nga Domingo sang Disyembre pagkatapos nga ang mga pumuluyo nagmartsa sa sentro sang Tehran batok sa nagasaka nga inflation kag ang padayon nga pagnubo sang balor sang pungsodnon nga kuwarta nga rial.
Samtang suno sa mga opisyal, bukas sila sa pagpamati sa mga reklamo sang pumuluyo sa ekonomiya kag gin-angot ang nagapadayon nga kinagamo sa mga “rioters” kag gina-alegar pagpasilabot sang mga dumuluong nga pungsod, partikular ang Estados Unidos kag Israel.
Kaangot sini, nagpasalig ini nga kaayuhon sang gobyerno ang nagalala nga problema sa ekonomiya sang pungsod. Samtang, nagpaandam naman ang Iran batok sa anuman nga pagpanghilabot sang mga dumuluong.
