Masobra 100 ka mga puluy-an, natupok sang daku nga sunog sa Norway

Kapin sa 100 ka mga balay ang naabo sa daku nga sunog nga nagluntad sa siyudad sang Drammen sa Norway.

Suno sa mga rescue officials, madamol nga itom nga aso ang nagtabon sa lugar nga yara mga 50 kilometro gikan sa kapital nga Oslo.

Sa pihak sang kadakuon sang sunog, wala sang napatay ukon nadula nga residente.

Kapin sa 60 ka mga bombero ang nagresponde sa insidente, samtang nagbulig man ang mga helicopter paagi sa paghulog sang tubig agud mapunggan ang paglapta sang kalayo.

Suno sa mga otoridad, bangud sa mabaskog nga hangin, madasig nga naglapta ang kalayo pakadto sa malapit nga kagubatan gani gin-evacuate ang ginatos ka mga residente.

Padayon naman ang imbestigasyon sa gintunaan sang sunog kag ang pag-assess sang kahalitan.