CAPIZ-Naglab-ot sa 1,181 ka kilo ukon katumbas sang 85 ka sako sang basura ang nakolekta sa ginpatigayon nga community clean-up drive kag waste audit sa Punta Libas, Barangay Libas, Roxas City sang Oktubre 23, 2026.
Ang aktibidad ginpangunahan sang Capiz Provincial Government sa idalum sang administrasyon ni Governor Fredenil H. Castro, paagi sa Capiz Provincial Environment and Natural Resources Office (CaPENRO), sa pagpakig-angot sa Barangay Libas.
Lakip sa mga nakolekta nga basura ang mga plastik nga botelya ukon polyethylene terephthalate (PET), mga sako, trapo, Styrofoam kag iban pa nga residual waste. Nagapakita ini sang kadamuon sang basura nga nagatipon sa komunidad kag sang importansya sang nagakaigo nga pagdumala kag pag-dispose sini.
Nag-upod sa aktibidad si EnP. Ronald Allan F. Cullo, ENR Officer, upod ang mga opisyal kag barangay tanod sang Barangay Libas sa pagpanguna ni Punong Barangay Jobby F. Nalica, mga Barangay Health Worker (BHW), benepisyaryo sang Pantawid Pamilyang Pilipino Program (4Ps) kag mga personnel sang CaPENRO.
Dugang pa sa pagpaninlo sang palibot, ginpabug-atan man sa aktibidad ang importansya sang pagkuha sang mga nagkalat nga basura kag mga suludlan nga mahimo tipunan sang tubig-ulan kag mangin lugar nga palanubuan sang mga lamok. Ini ang may kaangtanan sa mga ginreport nga kaso sang dengue sa lugar.
Ginapahanumdom sang inisyatibo ang mga pumuluyo nga ang pagmintinar sang kalimpyo indi lamang nagasalig sa mga clean-up drive, kundi nagakinahanglan man sang responsable nga pagdumala sang basura sa tagsa ka panimalay kag aktibo nga pagpakigbahin sang komunidad agud maprotektahan ang palibot kag panglawas sang publiko.
