ROXAS CITY, CAPIZ – Ginakabalak-an sang madamo nga benepisyaryo sang Pantawid Pamilyang Pilipino Program ukon 4Ps sa Region 6 nga makakas sila sa sa programa pag-abot sang tuig 2026 bangud sa 7-year restriction kun indi pa ma-amyendaran ang Republic Act 11310 ukon ang Pantawid Pamilyang Pilipino Program Act.
Ang pag-amyendar sang layi ang nagahatag sa mga benepisyaryo sang 4Ps nga makapabilin pa sa programa sang masobra pito ka tuig kag makahatag ini sang mayo nga pagpangabuhi nga wala sang restriction sang sever-year period.
Sa interview sang Bombo Radyo kay Belen P. Piad-Gebusion, Division Chief sang 4Ps DSWD Field Office 6, iya ginpahayag nga umpisa sang ginpatuman ang RA 11310 sadtong 2019, ginabanta naglab-ot sa 100,179 nga pamilya sa rehiyon ang maigo sa pito ka tuig nga limitasyon pag-abot sa 2026.
Suno kay Gebusion, sa 100,179 nga pamilya sa rehiyon ang maigo sa pito ka tuig nga limitasyon, 90,000 na ang na-assess kag nagapaidalom na subong sa masunod nga mga proseso kaangay sa pag-review ukon preparasyon sang ila pag-exit ukon pagpadayon sang suporta depende sa mangin resulta sang evaluation.
Matandaan nga sa ika-apat nga State of the Nation Address (SONA) ni President Ferdinand Marcos Jr., nagpanawagan ini nga amyendaran ukon bag-ohon ang pila ka probinsyon sang 4Ps Law.
– Interviewed by: Bombo Lynd-C Bade
