Padayon nga ginamonitor sang Philippine Institute of Volcanology and Seismology (PHIVOLCS) ang sitwasyon sa Mindanao matapos ang mapintas nga magnitude 7.8 nga linog nga nagtay-og sa Sarangani sang Hunyo 8.
Suno sa PHIVOLCS, nagsaka na sa 1,158 ang kabug-osan nga aftershocks nga naitala kasunod sang nag-unang pagyanig. Nagapakita ini nga aktibo pa gihapon ang fault system nga naapektuhan sang linog kag posible pa ang pag-abot sang dugang nga mga aftershocks.
Sa una nga mga oras pagkatapos sang linog, 138 pa lamang ka aftershocks ang naitala sang ahensya, nga may kusog halin magnitude 1.3 tubtob magnitude 6.7. Siyam sini ang ginreport nga nabatyagan sang mga residente sa mga apektado nga lugar.
Bangud sa sunod-sunod nga mga aftershocks, padayon nga ginapahanumdom sang PHIVOLCS ang publiko nga likawan anay ang pagsulod sa mga naguba ukon may bitak nga mga balay kag establisyemento bangud sang posible nga pagguho sini sa tion sang panibag-o nga pagyanig.
Samtang nagapadayon ang assessment kag relief operations, naglab-ot na sa masobra 35 ang napatay kag ginatos naman ang nasamaran bangud sang linog. Kadam-an sa mga biktima ang naapektuhan sang nagkalaguba nga mga istruktura, nagkatumpag nga debris, kag mga landslide sa nagkalain-lain nga bahin sang Mindanao.
Gina-ekspektar sang mga eksperto nga mahimo pa magpadayon ang mga aftershocks sa masunod nga mga adlaw ukon semana, gani ginapanawagan ang publiko nga magpabilin alerto kag magsunod sa mga advisories sang PHIVOLCS kag lokal nga mga otoridad para sa ila kaluwasan.
