Ginatudlo sang IBON Foundation nga may yara sang masobra 200 congressmen ang posible involved sa maanomaliya nga flood control projects sa nagkalain-lain nga bahin sang pungsod.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga sa website sang presidente nga ‘sumbong sa pangulo’, may yara sang 230 sa masobra 9,000 ka mga proyekto ang makaduluda.
Suno kay Africa, sa probinsya sang Capiz, may yara sang total nga P1.2 billion nga mga flood control projects sa diin ang apat diri ang makaduluda bangud nga gintunga sa tatlo ka contractor sa palarehos nga kantidad nga P62.7 million
Pahayag pa niya, ang nagakatabo subong ang indi isa ka pruweba agud pamatud-an nga may problema kundi isa ka indikasyon nga may yara sang nagakatabo nga maanomaliya sa mga flood control projects.
Nahibaluan nga ang kada congressman ang may yara sang tag-isa ka proyekto sa Department of Public Works and Highways (DPWH).
Nagapanawagan man ang natungdan sa national government nga mangin bukas sa publiko kag indi pagtaguon ang iban pa nga mga impormasyon angut sa flood control projects bangud ang transparency kag accountability amo ang liyabe agud malikawan ang padayon nga pag-abusar sa pondo.
Interviewed by:Bombo Roadnie Daban Dalanon via Bombohanay Bigtime
