-- ADVERTISEMENT --

MANILA, Philippines – Ginapagwa na ang masobra 200 ka raliyista matapos ang pag-aresto sa protesta kontra pax silica kag sa pagbisita ni US President Donald Trump sa Pilipinas, matapos magpagwa sang release order ang Office of the Prosecutor sang Muntinlupa City para sa dugang nga imbestigasyon.

Sa interview sang Bombo Radyo kay France Castro, former ACT Teachers Party-list representative, iya ginpahayag nga wala sang kaso nga ginpasaka ang Philippine National Police batok sa mga raliyista, gani ginpagwa na sila sa Camp Bagong Diwa.

Suno kay Castro, ang mga gin-aresto amo ang mga nagpakigbahin sa protesta halin sa nagkalain-lain nga lugar sa Southern Tagalog, lakip ang Cavite, Batangas, Quezon kag Mindoro kun sa diin ginkondenar niya ang gin-alegar nga pagpangharass kag pagpugong sa mga raliyista nga magpahayag sang ila opinion.

Pahayag pa niya, may mga video nga nagapakita sang gin-alegar nga pagpanginmatay kag pagpamwersa sa mga na detained, kag may mga report man sang mga gaob kag pilas nga ila naangkon, samtang gin-alegar man sini nga nadugayan ang paghatag sang pagkaon sa mga na detained kag ang pagpasulod sa ila mga abogado kag pamilya.

Dugang pa niya, ginatun-an sang mga abogado sang mga raliyista ang posibilidad nga magpasaka sang counter-charges batok sa mga pulis nga ginatudlo nga responsable sa ila pagdakop kag pagdetine, lakip ang gin-alegar nga iligal detention kag police brutality.

-- ADVERTISEMENT --

Samtang, ginpahayag ni Castro nga magapadayon ang ila kampanya kontra sa Pax Silica bisan pa wala natigayon ang pagpirma sang kasugtanan sa tion sang pagbisita ni Trump.

Ginapanindugan nila nga dapat protektahan sang gobyerno ang soberanya sang Pilipinas kag siguruhon nga ang paggamit sang natural resources sang pungsod magabenepisyo sa mga Pilipino, ilabi na sa mga mangunguma kag katutubo.

Sa karon, ginapangabay sang grupo sa publiko nga magpadayon sa pagpanindugan para sa soberanya sang pungsod kag pagprotektar sang kinamatarong sang mga pumuluyo.