ROXAS CITY – Nagdangat na sa masobra 2,000 nga mga residente, ang apektado sang Paralytic Shellfish Poisoning (PSP) ukon red tide sa banwa sang Pontevedra.
Sa interview sang Bombo Radyo kay Honorable Henry Tumlos, alkalde sa banwa sang Pontevedra ginpahayag sini nga may yara sang iban nga pumuluyo sa ila lugar ang nagapalapit sa iya talatapan agud magpangyo sang bulig bangud apektado ang ila pangabuy-anan.
Suno kay Tumlos, wala naga-untat ang LGU-Pontevedra sa pagpangita sang tikang agud mabuligan ang ila mga nasakupan.
Bangud sini, liwat nga nagapaalinton kag nagapahanumdum si Tumlos sa mga pumuluyo ilabi na ang yara sa mga coastal areas nga likawan ang pagpanguha, pagbaligya kag pagkaon sang mga panginhason agud malikawan nga mangin biktima sang red tide.
Sa karun, nagahulat pa sila sang mando nagikan sa Bureau of Fisheries and Aquatic Resources (BFAR) angut sa nasambit nga Paralytic Shellfish Poisoning (PSP) ukon red tide sa probinsya.
