Masobra 25,000 ka mga buluthuan sa pungsod ang yara sa risgo sang pagbaha kag pagtiphag sang duta tuga sang ulan bangud sang mabaskog nga ulan tuga sang Severe Tropical Storm Tino suno sa Department of Education (DepEd).
Suno sa DepEd-Disaster Risk Reduction and Management Service, 9,558 ka mga eskwelahan ang yara sa risgo sang pagbaha samtang 15,668 naman ka mga eskwelahan ang vulnerable sa landslide.
Nagpanugyan man ang DepEd sa mga buluthuan kag lokal nga gobyerno nga magpreparar sa emergency response, kag siguraduhon nga safe ang ila mga kagamitan kag supplies.
As of 5 p.m., Nobyembre 2, ang Bagyo Tino nagmentinar sang maximum sustained winds nga 95 kph, gustiness nga tubtob 115 kph, kag nagahulag pa-west sa ibabaw sang Philippine Sea. Signal No.1 ang ginpataas sa siyam ka mga lugar sa Eastern Visayas kag Northern Mindanao.
Ginalauman sang PAGASA nga magaigo ang bagyo sa Eastern Samar ukon Dinagat Islands sa Lunes, Nobyembre 3 antes magtabok sa Visayas kag northern Palawan. Posible nga magabaskog pa gid ang bagyo kag magalab-ot sa super typhoon strength.
