ROXAS CITY – Gilayon nga ginbuligan sang lokal nga gobyerno sang probinsiya sang Capiz ang masobra 30 ka mga trabahador nga na-stranded sa karon sa isla sang Boracay bangud sa ginapatuman nga enhanced community quarantine tuga sang coronavirus disease (COVID-19) pandemic.
Sa interview sang Bombo Radyo kay Capiz Provincial Disaster Risk Reduction and Management Office (PDRRMO) Head Judy Grace Pelaez, ginpahayag sini nga gilayon sila nga nagpakig-angut sa PDRRMO sang Malay, Aklan agud mapalab-ot ang relief assistance para sa nasambit nga mga trabahador gikan sa lokal nga gobyerno sang Capiz.
Suno diri nga nakabaton sang tag-tatlo ka mga food packs ang mga ini kag dugang nga tatlo ka mga boxes man sang food packs ang ila ginpartida.
Mahibaluan nga nagpanawagan sang bulig ang nasambit nga mga trabahador sa Bombo Radyo agud makapauli kasunod sang pagsarado sang ila ginatrabahuan nga mga establisyemento sa isla.
Apang ginklaro ni Pelaez nga indi pa makapauli ang nasambit nga mga trabahador sa probinsiya bangud wala pa ginapahanugutan nga makasulod diri ang mga returning residents bangud sang ginapatuman nga quarantine protocols.
Apang ginpasiguro sini nga indi pagpabay-an sang lokal nga gobyerno sang probinsiya ang nasambit nga mga trabahador.
