ROXAS CITY – Masobra 30 ka mga representante sang punerarya sa probinsya ang nagtambong sa pagsinapol nga ginpatawag ni Gov. Fredinil “Oto” Castro nakaligad nga semana para sa burial assistance sang mga indigent nga pamilya.
Ini ang ginsiling ni Ms. Chriselle Diaz, General manager sang Joel Memorial Homes sang mainterview sang Bombo Radyo.
Suno diri, ila ginhinun-anon ang presyo sang burial package nga luyag ipatuman sang gobernador sa bulan sang Agosto.
Nagkasugot man ang mga tagdumalahan sang punerarya sa presyo apang kalakip lamang diri ang pagpick-up sa bangkay sa ospital man ukon sa puluy-an, embalsamasyon, lungon, kag paglubong.
Ang pamilya naman sang nagtaliwan ang maga-aman sang dekorasyon kaangay sang bulak, kurtina, kag lapida apang mahimo man ini nga ihatag sang punerarya kun madugang sang bayad ang mga himata.
Dako man suno diri ang mabulig sang programa ilabi na sa mga kubos nga pamilya amu man sa ila nga mga negosyante bangud ginpromisa ni Gov. Castro nga gilayon nila makuha ang bayad sa tion nga manukot na sila sa kapitolyo.
