Masobra 30 ka personnel sang Philippine Army sang Camp Peralta, Jamindan ang na-deputize na sang Department of Environment and Natural Resources (DENR) Capiz agud makabulig sa pagpatuman sang environmental laws.
Sa interview sang Bombo Radyo kay Dr. Ernest Federiso, Provincial Environment and Natural Resources Officer sang DENR-Capiz, iya ginpahayag nga ang mga personnel gin-train sa nagkalain-lain nga environmental laws kag ginpreparar agud makabulig sa pag-monitor kag pagpatuman sang mga kasuguan sa pagproteher sang natural resources.
Suno kay Dr. Federiso, may yara sang otoridad ang mga na-deputize nga personnel nga magdakop sang mga persona nga madakpan nga nagalapas sa environmental laws.
Sa tion nga madakpan, tawgon ang DENR para sa proper turn-over sang mga nadakpan kag pagproseso sang mga nakumpiska nga forest products.
Ang mga nakumpiska nga kahoy ipaidalom sa proper inventory kag scaling sang DENR bilang kabahin sang nagakaigo nga documentation kag pagproseso.
Pahayag niya, kinahanglan ang amo nga deputization bangud nakita sang Philippine Army nga malapad na ang mga lugar nga ginakaingin sa diin ang mga lugar nga madabong pa sang una, mahawan na subong.
