Masobra 300 nga pasahero, stranded sa gihapon sa mga pantalan sa Bicol kag Southern Tagalog Region

Naglab-ot sa 354 nga pasahero kalakip ang mga truck driver kag mga helper ang stranded sa gihapon sa pila ka mga pantalan partikular sa Bicol Region kag Southern Tagalog Region bangud sa malain nga tyempo.

Suno sa Phililippine Coast Guard (PCG), yara sa 158 nga pasahero ang stranded sa pito ka pantalan sa Southern Tagalog.

Magluwas diri, may 4 nga vessels, 14 nga rolling cargoes kag 5 motorbanca ang stranded.

Yara naman sa 196 nga pasahero ang stranded sa 8 ka pantalan sa Bicol Region kalakip na ang 8 nga vessels kag 55 nga rolling cargoes.

Pito ka iban pa nga vessels kag 13 ka motorbanca ang temporary anay nga nagdungka sa iban nga pantalan agud luwas sa katalagman tuga sang malain nga tyempo.