Masobra 300 sugarcane farmers sa Dumarao, Capiz, apektado sang RSSI

Masobra 300 ka mga mangunguma sa Dumarao, Capiz ang nagaproblema bangud sa halit sang Red Stripe Streaking Infection (RSSI), sa ginabanta 123 ektarya sang katubohan.

Sa interview sang Bombo Radyo kay Mayor Matteo Hachuela, iya ginpahayag nga posible magtaas pa ang numero sang mga katubohan nga apektado bangud padayon sa gihapon ang pag-monitor sang Municipal Agriculture Office.

Suno kay Hachuela, nagahulat na lang sila sang bulig halin sa Capiz provincial government nga posible maabot subong ukon sa masunod nga semana kasunod sang deklarasyon sang State of Calamity.

Dugang pa sang natungdan, ginakabalak-an gid sang sugarcane planters ang sitwasyon subong ilabi na nga ang milling season ginalauman nga magaumpisa sa Nobyembre ukon Disyembre.