Sa pihak sang ceasefire sa tunga sang Thailand kag Cambodia, nagtuhaw ang mas madalom nga isyu sa likod sang lima ka adlaw nga maduguon nga bakbakan sa border sang duha ka pungsod.
Sa interview sang Bombo Radyo kay Bombo Jennifer Togueran, International Correspondent sa Cambodia, iya nga gibnbuyagyag nga naglab-ot sa 300,000 ka indibidwal ang napilitan nga mag-evacuate samtang 43 ang nabalhag nga napatay.
Apang suno sa mga report, indi lamang simple nga tensyon sa border ang natabo kundi isa ini ka manipestasyon sang militarisasyon sa rehiyon nga ginagamitan sang mga moderno nga armas gikan sa nagkalain-lain nga pungsod.
Suno kay Togueran, pareho nga naggamit ang Thailand kag Cambodia sang mga high-end nga armas gikan sa China, Russia, Sweden, kag Estados Unidos. Kabahin ang mga ini sang multi-million dollar nga kasugtanan sa armas nga ginselyuhan pa sadtong 2018.
Samtang, nagbalos ang Thailand pinaagi sa deployment sang F-16 fighter jets, drones, Swedish Gripen fighter aircraft kag American-made Stryker infantry vehicles.
Para naman sa mga eksperto, senyales ini sang nagalala nga “proxy power game” sa Asya, kun sa diin ang mga pungsod kasubong sang China, Russia, kag Amerika ang may tagsa ka interes sa regional security kag impluwensiya.
Pahayag sang pila ka human rights group, dapat magpatigayon sang lapnagon nga imbestigasyon ang United Nations indi lamang sa posible nga war crimes, kundi pati sa padayon nga pag-armas sang mga mahina nga pungsod gamit ang pondo kag teknolohiya gikan sa mga gamhanan nga mga dumuluong.
