Ginsiguro sang Department of Migrant Workers (DMW) nga handa sila nga buligan ang mga Overseas Filipino Workers (OFWs) sa United States, nga ginakauman nga maapektuhan sa posible nga mass deportation kaangut sang pagbaylo sang US policies sa idalom sang administrasyon sang newly elected nga US President nga si Donald Trump.
Suno kay DMW Sec. Hans Leo Cacdac, ginabulubanta nga yara sa 370,000 undocumented Pinoy immigrants sa US ang posible nga maapektuhan sa panukala nga U.S. Mass Deportation Policy, nga target i-deport ang yara sa 1 milyon undocumented immigrants kada tuig.
Matandaan nga yara sa 300,000 undocumented immigrants kada tuig sadto ang napa-deport sa una nga termino ni Trump ukon sang 2017 tubtob 2020. Kun sa diin yara sa 3,500 nga pinoy ang napauli sa Pilipinas.
Suno kay Cacdac, handa na ang financial, medical, kag legal assistance sang ahensya para sa mga maapektuhan nga pinoy sa US.
Pinaagi sang National Reintegration Center para sa mga OFWs, magabulig man ang ahensya sa retooling, reskilling, kag employment facilitation sang mga maapektuhan nga employees. Ini ang pagbinuligay sang DOLE, DTI kag TESDA.
