Naglab-ot na sa masobra 40 ka indibidwal ang napatay sa nagluntad nga stampede sa Kumbh Mela festival sa India.
Indi naman magnubo sa 60 ka tawo ang pilason sa insidente.
Suno sa mga opisyal nga indi magnubo sa 100 million ka mga tawo ang nagtambong kag nagpaligo sa Hindu religious festival.
Sa inisyal nga imbestigasyon sang mga otoridad, ginguba sang pila ka mga tawo ang nakaharang nga barrier agud makaligo ang mga ini sa suba.
Nagpalab-ot naman sang pakig-unong si Indian Prime Minister Narendra Modi sa mga himata sang napatay nga biktima.
Ang nasambit nga festival ang ginakunsiderar bilang pinakadako kag pinakamalinong nga kahiwatan kada tuig.
Sa masobra anom na ka semana, naglab-ot na sa 400 million ka mga tawo ang nagtambong sa Maha Kumbh Mela ukon festival of Sacred Pitcher sa kilid sang Prayagraj.
Ginpanginwala naman sang mga kapulisan nga nagkulang sila sa paghatag sang seguridad bangud nagbutang man ang mga ini sang mga security camera sa lugar.
