Ginpamatud-an ini ni PNP Information and Communications Technology Management Directorate Director Brig. Gen. Engelbert Soriano.
Suno sa iya, sa kabug-usan nga 2,696 ka mga BWC nga nabakal, kinahanglan pa ini ipanghatag sa masobra 200,000 ka aktibo nga mga kapulisan sa bug-os nga pungsod.
Ang mga amo nga BWC ginbakal pa sang 2019 bilang kabahin sang ginpabaskog nga kampanya kontra iligal nga droga sang administrasyon ni anay Presidente Rodrigo Duterte. Dugang pa ni Soriano, bangud sang kalawig sang panahon, posible nga naabot na sang pila ka camera ang ila ginatawag nga “lifespan.”
Ginpahayag man niya nga ginaremedyuhan na lang sang PNP ang pila ka mga camera, ilabi na bangud indi malikawan nga mabasa ini sang ulan samtang ginagamit sang mga pulis.
Target sang PNP nga makabakal sang masobra 90,000 ka mga body-worn camera tubtob sa tuig 2028.
