ROXAS CITY – Nagahulat ang 4,641 ka job vacancies sa 72 tanan ka mga employer sa ginpatigayon nga ‘Job Fair’ sang Department of Labor and Employment (DOLE) – Region VI bilang selebrasyon sang 121st Labor Day subong nga adlaw.
Ini ang ginkumpirmar ni Ms. Melissa Navarra, spokesperson sang Labor Day Job Fair sang mainterview sang Bombo Radyo.
Suno kay Navarra, magluwas sa ginhiwat nga job fair, may yara man sang ginhatag nga government assistance para sa Tulong Panghanapbuhay sa Ating Disadvantaged/Displaced (TUPAD) Workers kag livelihood support para sa 11, 780 ka mga benepisyaryo sa bilog nga rehiyon.
Kun sa diin nagbaton man sang pay-out ang mga TUPAD beneficiaries nga nagikan sa banwa sang Mambusao, Cuartero kag Dumalag.
Nagbaton man sang payout ang mga Special Program for Employment of Students (SPES) recipients sang Filamer Christian University kag Hercor College.
Magluwas sa job fair, nagtan-ay man sang serbisyo ang pila ka mga government agencies kaangay sang onsite process sang National Bureau of Investigation Clearance, PAG-IBIG, SSS kag madamo pa.
Dugang pa ni Navarra nga ginpatigayon man ang Kadiwa ng Pangulo Para sa Manggagawa nga nagatan-ay sang dekalidad nga produkto sa masarangan nga presyo nagikan sa Department of Labor and Employment- assisted livelihood projects, agriculture kag fishery products nagikan sa Department of Agriculture- supported farmer organizations kag Department of Trade and Industry (DTI) nga ginakalakipan sang micro, small and medium enterprises (MSME’s).
