Nakakumpiskar sang masobra 5 ka mga improvised cannon ukon boga ang mga opisyales sang Barangay Punta Tabuc, sining syudad.
Sa interview sang Bombo Radyo kay Punong Barangay Nestor Buenviaje sang Brgy Punta Tabuc, padayon nila nga ginahatagan sang mga nagakaigo nga impormasyon kag paandam ang mga ginikanan ilabi na ang mga menor de edad sang mga posible nga insidente nga tunaan sa paggamit sang ginadumilian nga palupok partikular na ang boga.
Dugang pa sini, kalabanan sa mga nakuhaan nga nagagamit kag nagahimo sa nasambit nga palupok ang mga menor de edad nga ginabanta nga nagapang-edaron sang 10 tubtob 15-anyos.
Nagadayon naman ang paglibot sang mga opisyales sang nasambit nga barangay agud nga magkumpiskar sang mga boga kag mga iligal nga palupok kag nagbilin man si Buenviaje sang mensahe nga kun mahimo nga maggamit na lamang sang torotot kag mga sounds agud nga malikawan ang mga insidente sa pagsug-alaw sang Bag-ong Tuig.
