ROXAS CITY – Nagpalab-ot sang pagkadismaya ang grupo sang mga construction workers sa gina-construct nga Roxas Memorial Provincial Hospital (RMPH) sa Barangay Lanot, Roxas City, bangud sa duha na sila ka semana nga wala maswelduhan.
Sa interview sang Bombo Radyo kay Jessie Dumapit, Herjhon Timban kag Fredinel Barredo, pila lamang sa nagtindog agud i-reklamo ang ila contractor nga Silver Dragon construction, bangud tubtob sa karon, wala ang mga ini nakabaton sang sweldo.
Suno sa mga ini, nga masobra sila 50 nga nagatrabaho kun sa diin semanal ang ila swelduhan kag pakyawan ang ila kontrata.
Nakapakig-angut man sila sa ila Foreman nga si ‘Richard’ (wala makahatag sang apelyido) nga taga-Bacolod man, kag ginpahayag nga wala pa mahatag ang ila sweldo sang contractor.
Nahibaluan nga nagpadulong naman ang 13 sa mga ini sa talatapan ni Governor Fredenil ‘Oto’ Castro agud magpangayo sang bulig nga masuwelduhan, apang ginpahayag sa ila suno diri, nga bayad na ang provincial government sa nasambit nga contractor.
Sa karon, nagalaum ang mga ini nga bisan partial lang ang ila mabaton kag makapabatyag sa ila ang Silver Dragon construction, bangud tuman nila ka kinahanglan ang kwarta.
