Ginkumpirmar sang pamunuan sang National Food Authority nga nakatalana nila nga ibaligya sa mga lokal nga gobyerno ang nagadangat sa masobra 500,000 nga sako sang bugas nga madugay na nga nakatambak sa mga warehouse.
Ginatuyo sa sini nga tikang nga gilayon madispose ang nasambit nga mga bugas kag indi naman ini tayuyon nga masamad.
Suno kay NFA administrator Larry Lacson, igabaligya nila ini sa mga gobyerno lokal sa mas barato nga presyo partikular na sa parte sang Metro Manila.
Base sa Republic Act No. 12078 nga gin-amyendahan sang RA 11203 ukon mas kilala sa tawag nga Rice Tariffication Law, ang bugas nga umabot na sa masobra isa ka bulan nga naka tambak ang kinahanglan na nga madispose.
Paathag ni Lacson, nagadangat sa karon sa 700,000 bags sang milled rice ang kabug-usan nga stocks sini sa bilog nga pungsod.
Ang pagbaligya sini sa mga LGU ang makabulig man sa mg residente nga makabakal sang barato nga bugas.
Nakatalana naman nga magpatigayon sang meeting ang NFA council para istoryahan kun pila ang igabaligya sini nga bugas per kilo sa mga LGU.
