Gina-ekspektar nga magaboto ang masobra 540,000 ka mga botante sa probinsya sang Capiz para sa Barangay and Sangguniang Kabataan Elections sa Nobyembre 2, 2026.
Sa interview sang Bombo Radyo kay Atty Will Arceño, Capiz Provincial Election Supervisor kag Assistant Regional Director – COMELEC Western Visayas, iya ginpahayag nga nangin madinalag-on ang ulihi nga adlaw sang voters registration sang tinalikdan nga lunes nga nakabalhag sang 3,264 ka mga voters kun sa diin pinakamadamu sa syudad sang Roxas, kag ginasundan sang banwa sang Tapaz, Mambusao, Jamindan kag Panitan.
Suno kay Arceño, bangud madamu sang nagapila, may yara sang pila ka mga gusto nga magparehistro nga wala na matagaan sang kahigayunan tungod sang limitado nga oras sang pila ka mga venue site.
Pahayag pa niya,ginatutukan man sang ila talatapan ang mga flying voter bangud ini hugot nga ginadumilian sa layi especially na sa election.
Samtang, sa pagtakop sang voter registration, sunod naman nga pagahandaan sang Comelec amo ang filing sang certificate of candidacy sa mga gusto nga magpadalagan.
