ROXAS CITY – Kabug-usan nga 5, 181 curfew violators ang narekord sa bilog nga Western Visayas sa isa ka bulan nga implementasyon sang Enhanced Community Quarantine (ECQ) bangud sa coronavirus disease (COVID-19) pandemic.
Ini ang ginpahayag mismo ni Police Regional Office 6 Director Police Brigadier General Rene Pamuspusan sa iya nga official statement sini nga adlaw.
Sa nasambit nga numero, 5, 068 violators ang ginpaandaman pa lamang sang mga kapulisan, 57 ang ginpamulta kag 56 naman ang naaresto.
Sa pihak sang mataas nga numero sang violators ginakalipay sang pulisya ang 45% nga pagnubo sang total crime incidents sa rehiyon ukon 106 nga narekord humalin Marso 17 tubtob Abril 16 nga mas manubo sa narekord nga krimen sadtong Pebrero 16 tubtob Marso 16 nga nakarekord sang 234 ka mga krimen.
Mas manubo man ini sang 63% ukon 133 cases sa kapareho nga period sadtong nakaligad nga tuig nga nakarekord sang 362 cases.
Dako naman ang pagpasalamat sang opisyal sa mga kapulisan kag iban pa nga mga frontliners agud mapabilin nga malinong ang rehiyon samtang nagapadayon ang ECQ.
Ginkompirma man sini nga nagdangat sa 3, 220 pamilya ang nabuligan sang PRO-6 pinaagi sa ila nga “Adopt-a-Family Program: Kapwa ko, Sagot ko”.
