Nakabaton sang tig-P10,000 nga cash incentive ang kabilugan nga 639 ka mga senior citizens nga yara sa edad nga 80, 85, 90, kag 95 sa Western Visayas sa idalom sang Expanded Centenarians Act bilang pagkilala sa ila nga malawig nga kabuhi.
Magluwas diri, apat ka centenarians man ukon ang mga naglab-ot sa edad nga 100 ang ginhatag sang tig-P100,000, kun sa diin tatlo sa ila ang buhi pa samtang ang isa ang nagtaliwan na.
Sa interview sang Bombo Radyo kay National Commission of Senior Citizens Western Visayas Director Ann Rapunzel “Rara” Ganzon, iya ginpahayag nga personal nga gindul-ong ang ayuda sa mga benepisyaryo bila kabahin sang regional rollout nga nag-umpisa sa Bacolod City kag nagpadayon sa Guimaras kag Iloilo Province.
Suno kay Ganzon, may masunod pa nga pagpanagtag nga natalana sa Mayo agud malab-ot ang mas madamo pa nga kwalipikado nga senior citizens.
Pahayag niya, nagapasalamat naman ang pila ka benepisyaryo bangud dako nga bulig ang nabaton nga kwarta para sa pagbakal sang maintenance medicines kag pagkaon. Dugang pa sang natungdan, pabaskugon sang ila nga ahensya ang mga programa sa ikaayong-lawas para sa mga katigulangan, kalakip ang paghatag sang libre nga bakuna kag mga bulong sa mga health center.
