ROXAS CITY – Nakumpiskar sang mga katapo sang Criminal Investigation and Detection Group (CIDG) Capiz ang masobra 800 ka litros sang gasolina kag krudo sa isa ka mister pinaagi sa ginkasa nga entrapment operation sa Sitio Baybay, Barangay Ilawod, Pontevedra sang Marso 17.
Ginkilala ang nadakpan nga si Gilbert Antatico, 52-anyos kag residente sang Barangay Linampongan sang nasambit nga banwa.
Sa interview sang Bombo Radyo kay Punong Barangay Dominador Burata sang Barangay Ilawod, suno diri natigayon nga ma-aresto si Antatico matapos nga nabaklan sang isa ka gallon ukon 20 ka litros sang krudo sa baylo sang P1,300.
Pahayag sini, madugay na nagabaligya ang magpamilya sang tiningi nga gasolina kag krudo apang wala ini nagalaum nga madamo na ang ila gina-stock nga produktong petrolyo kag nagatuga sang kompetensyon sa mga otorisado nga gasolinahan.
Suno kay Burata, natalupangdan na sini ang pagdamo sang ila customer kabangdanan agud magreklamo na ang mga tag-iya sang gasolinahan.
Bangud sa operasyon, narekober sa posesyon ni Antatico ang 31 ka gallon sang krudo, 10 ka gallon sang gasolina nga ginabulubanta nagabalor tanan sa P52,680 kag P1,300 nga buybust money.
Ginlapas ni Antatico ang Presidential Decree 1865 ukon Illegal Trade of Petroleum Products kag magapangatubang sa panumbongon.
Samtang, pagahugton naman ni Burata ang pagdumili sa pagbaligya sang bote-bote ukon tiningi nga gasolina bangud sa kahalitan nga matuga sini kun mapabay-an.
