Naglab-ot sa 8,813 ka job vacancies ang iga-offer sa World Café of Opportunities: Career and Skills Expo 2026 nga pagahiwaton sa Capiz sini nga Agosto 21.
Suno kay PESO-Capiz Manager John Leo Beldia, 19 ka mga employers ang magapakigbahin sa amo nga aktibidad nga ginalakipan sang 14 ka local employers kag lima ka overseas manpower agencies nga magatanyag sang 139 ka nagkalain-lain nga posisyon.
Sa kabug-usan nga bakante, 4,093 ang para sa lokal nga trabaho nga nagasakop sang 64 ka posisyon, samtang 4,720 naman ang overseas job orders para sa 67 ka nagkalain-lain nga posisyon.
Magluwas sa mga oportunidad sa trabaho, ang expo magapakita man sang negosyo, palangabuhian kag One-Stop Shop, sa diin may yara sang mga oportunidad sa palangabuhian, paghanas sa ikasarang kag mga serbisyo nga may kaangtanan sa trabaho gikan sa mga ahensya sang national government.
Lakip man sa nasambit nga aktibidad ang mga eskwelahan sang TESDA sa Capiz nga magapakilala sang ila mga serbisyo kag kwalipikasyon nga tanyag.
Gin-athag man ni Beldia nga indi kinahanglan nga may yara sang TESDA scholarship ang isa ka indibidwal agud makatuon kag makakuha sang kwalipikasyon.
Sa subong, nagdangat na sa 988 ka mga online applicants ang nagparehistro para sa amo nga aktibidad.
Gina-engganyo man ni Beldia ang publiko nga magpakigbahin sa sini nga aktibidad bangud kon kaisa lang ini ginatanyag sa World Café of Opportunities.
