Masobra 80,000 ka mga indibidwal, na-apektuhan sang Bagyo Maymay, Habagat kag Bagyo Luis

Masobra 80,000 ka mga indibidwal ukon kapin 23,000 ka pamilya ang na-apektuhan sang Bagyo Maymay, hangin habagat kag sang nagligad nga Bagyo Luis.

Suno sa Office of Civil Defense (OCD), ang mga apektado nga pamilya yara sa Ilocos Region, Cagayan Valley, Central Luzon, Zamboanga Peninsula, BARMM kag Cordillera Administrative Region sa diin yara na sa masobra 2,000 sa ila ang ginpang-evacuate.

Samtang wala naman sang nareport nga patay, pilason ukon missing nga tawo bangud sang malain nga panahon.

Apang, 12 ka balay ang nahalitan kag 83 ka mga lugar ang ginbaha.

Ginpasalig naman sang Department of Social Welfare and Development (DSWD) nga padayon ang paghatag sang bulig sa mga pamilya nga na-apektuhan sang kalamidad.