ROXAS CITY – Masobra 8, 000 ektaryas sang mga pananom ang apektado sang El Niño phenomenon sa probinsiya sang Capiz.
Ini ang base mismo sa datos nga nakuha sang Office of the Provincial Agriculturist sa magkatuhay nga mga kabanwahanan sa probinsiya.
Sa interview sang Bombo Radyo kay Provincial Rice Program Coordinator Amefil Sagge, ginpahayag sini nga kabug-usan nga 8, 170 ka mga mangunguma na ang nagdangop sa ahensiya bangud sa epekto sang dry spell sa ila tagsa ka mga ulumhan.
Base sa damage assessment report sang ahensiya, nagalab-ot na sa masobra 340 milyones pesos ang kabug-usan nga danyos sa mga ulumhan bangud sa epekto sang tuman ka init nga panahon.
Bangud diri, natalana nga padulungan sang Department of Agriculture (DA) ang mga lugar nga apektado sang tuman ka init nga panahon agud magpatigayon sang ila nga validation.
Pinaagi sini, mahibaluan sang ahensiya kun pila ka mga mangunguma nga apektado sang El Niño phenomenon sa probinsiya ang makabaton sang nagakaigo nga bulig gikan sa gobyerno.
