Nagpaguwa ang Philippine Coast Guard (PCG) sang Maritime Safety Advisory bangud sa malain nga kondisyon sang panahon.
Epektibo ini halin alas-4:00 sang hapon tubtob alas-8:00 sang gab-i subong nga adlaw.
Base sa monitoring sang PCG, 62 ka mga pantalan sa nagkalain-lain nga bahin sang pungsod ang apektado.
Sa kabug-usan, 957 ka mga pasahero ang na-stranded, lakip ang 242 ka rolling cargoes, 13 ka sakayan pandagat kag 33 ka motorbanca.
Samtang 168 ka sakayan pandagat kag 154 ka motorbanca ang nagpasilong bangud sa malain nga panahon.
Sa Western Visayas, 261 ka mga pasahero kag 95 ka rolling cargoes ang na-stranded sa Caticlan Jetty Port, Port Parola kag Culasi-Lapuz Port.
Padayon ang panawagan sang PCG sa publiko nga sundon ang no sail policy kag iban pa nga safety advisories agud malikawan ang aksidente sa dagat.
