Nagbilin sang masobra P1.2 M nga kahalitan ang sunog nga nagluntad sa Colegio de la Purisima Concepcion – Main Campus kahapon nga adlaw.
Sa interview sang Bombo Radyo kay Senior Fire Officer 1 Junemar Galve, Chief Public Information Officer sang Bureau of Fire Protection – Roxas City, iya ginpahayag nga nag-umpisa ang sunog sa second floor sang Cultural and Music room sang nasambit nga buluthu-an nga ginpa-idalum sa una nga alarma.
Suno kay Senior Fire Officer 1 Galve, wala sang nabalhag nga napilasan bangud gilayon man nga ginpagwa ang tanan nga estudyante kag empleyado apang madamu sang mga gamit sa amo nga panalgan ang wala gid matabangan kag nasunog.
Pahayag pa niya, nagapadayon ang imbestigasyon sang mga katapo sang Bureau of Fire Protection – Roxas City agud mahibaluan ang gintunaan sang nasambit nga sunog.
Nagpanawagan man ang natungdan sa publiko nga mangin aligmat sa mga gamit sa balay kag iban pa nga establisyemento agud malikawan ang sunog.
