ROXAS CITY — Ginpasar na sang Sangguniang Panlalawigan sang Capiz ang Annual Appropriations Ordinance nga nagaunod sang masobra P1.8 billion nga pondo sang probinsiya subong nga tuig-2020.
Sa interview sang Bombo Radyo kay Board Member Jonathan Besa, chairman sang Committee on Finance and Appropriations, ginpahayag sini nga ginkasugtan sang bilog nga sanggunian ang pagpapasar sang annual budget sang probinsiya sa ila ginpatigayon nga sesyon sa Capiz Gymnasium sang Martes bangud kinahanglanon ini ilabi na karun nga panahon sang emerhensiya bangud sa coronavirus disease 2019 (COVID-19).
Bangud sini, nagalaum si Besa nga magamit na insigida sang gobyerno probinsiyal ang calamity fund sa pagpatuman sang mga tikang agud mapakigbatuan ang pamahog sang COVID-19 sa probinsiya.
Samtang sa nasambitan nga ordinansa, nagpain man sang P10 million nga pondo ang sanggunian bilang panigana sa tion nga maubos ang calamity fund sang probinsiya sa ginapatuman nga mga programa batuk sa COVID-19.
Mahibaluan nga naatrasar ang pagpapasar sang annual budget sang probinsiya bangud sa indi paghilisugot sadto sang executive kag legislative departments angut sa pila ka mga proyekto nga plano ipatuman sa mga kabaranggayan sa Capiz nga nakasaad sa Annual Investment Plan (AIP).
Apang nahitso man ini sang nagpasugot ang executive department sa rekomendasyon sang sanggunian nga rebisahon ang AIP agud matadlong ang gintumod nila nga mga iregularidad.#
