Dululungan nga ginguba sang Bureau of Internal Revenue (BIR) sa nagkalain-lain nga bahin sang pungsod ang 448,494 illicit vape products nga ginabulubanta nagabalor sang masobra P1.34 billion bangud sa wala nabaydan nga buwis kag multa.
Ginpatigayon ang aktibidad bilang kabahin sang isa ka three-day nationwide campaign batuk sa illicit trade kag gin-livestream sa opisyal nga social media page sang ahensiya.
Suno kay BIR Commissioner Charlito Martin Mendoza, katuyan sang pampubliko nga pagguba sa mga nasambit nga produkto nga ipakita nga wala gina-kunsinti sang gobyerno ang pagbaligya sang vape kag vapor products nga wala sang nagakaigo nga excise tax stamps.
Ginsiling pa sini nga mas hugton pagid sang BIR ang enforcement actions agud maproteheran ang ikaayong-lawas sang publiko kag masigurado ang insakto nga koleksyon sang buwis sang gobyerno.
