ROXAS CITY – Nakumpiskar sang Philippine Drug Enforcement Agency (PDEA) Capiz kag Aklan ang kapin P102,000 nga balor sang ginapatihan shabu sa isa ka drug den sa Railway St. Barangay Punta Tabuc Roxas City.
Ginkilala ang mga arestado nga sanday Ryan Tiempo, 34-anyos, residente sang Brgy V, Ralph Aninacion Losanta, 18-anyos residente sang Brgy Punta Tabuc, Rex Jimenez, 40-anyos residente sang Brgy X kag Marl Delco.
Nakuha sa paghinakup sang mga arestado ang 9 ka medium size kag 8 ka small size heat sealed sachet sang ginapatihan nga shabu, P600 nga buybust money kag drug paraphernalias.
Mahibaluan nga subject person sang buybust operation amu si Ryan Tiempo kag semana na ini nga ginamonitor sang mga otoridad.
Matandaan sang Hunyo 26, biktima sang pagpangluthang si Tiempo kun sa diin nag-angkon ini sang pilas sa ibabaw sang nawala nga porsyon sang dughan samtang nagabakal sang sigarilyo sa tiyangge.
Sa karon, yara na sa kustodiya sang PDEA-Capiz ang mga nadakpan para sa nagakaigo nga disposisyon.
