Nagpositibo sa E.coli kag Salmonella ang P14 million nga balor sang smuggled ukon ginpalusot nga sibuyas nagikan sa China.
Ini ang gin-kumpirmar ni Health Secretary Ted Herbosa kasunod sang ginpatigayon nga inspeksiyon sang mga opisyal sang Bureau of Customs kaupod ang Department Of Health, Food and Drugs Administration kag Department of Agriculture sa mga misdeclared agricultural product nga nakumpiskar sang mga nagligad nga binulan.
Suno sa tiglikom, ang smuggled nga pagkaon isa ka peligro para sa ikaayong lawas sang mga Pilipino bangud mahimo nga kontaminado ang mga ini sang mikrobyo nga posible magresulta sa kamatayon sang isa ka tawo rason nga ginpunto sang tiglikom nga may isyu sa food safety ang smuggled food items.
Naghalin ang mga kargamento sa China nga nag-abot sa Pilipnas sang Mayo 27 kag Hunyo 1 sa subong nga tuig kag gin-deklarar bilang assorted food items kasubong sang itlog, noodles kag kimchi. Apang, sang ginpatigayon na ang inspeksiyon sa mga kargamento sang Hunyo 10, nadiskubre sa containers ang pula nga mga sibuyas, puti nga sibuyas kag frozen mackerel nga ginabulubanta nagabalor sang masobra P34 million.
