Nag-alokar sang masobra P30 million nga pondo ang TESDA- Capiz para sa mga programa kag training sang TESDA-Capiz para sa mga Capiznon.
Sa interview sang Bombo Radyo kay Mr. Joel Villagracia, Provincial Director sang TESDA-Capiz, iya ginpahayag nga ang nasambit nga pondo ang kabahin sang mas ginpabakod nga inisyatibo sang gobyerno, kalakip ang suporta halin sa Technical Education and Skills Development Authority (TESDA) kag ang Local Government Support Fund (LGSF) para sa mga prayoridad nga proyekto sa probinsya kag sa siyudad sang Roxas.
Suno kay Villagracia, lakip sa mga prayoridad amu ang 4Ps beneficiaries kag mga Mangunguma agud mahatagan sang “technical-vocational” nga edukasyon ang mga pigado nga sektor agud makasulod sa trabaho ukon makatukod sang gamay nga negosyo.
Agud nga maka-avail, kinahanglan nga magdala sang mga importante nga dokumento kaangay sang valid ID antes mag-enroll.
Pagkatapos sang pagproseso sang aplikasyon, ang mga kwalipikado nga aplikante ang magapadayon sa training nga ginahatag sang TESDA.
Dugang pa sang natungdan, magapadayon ang nasambit nga programa nga nagatuyo nga buligan ang mga Pilipino nga mapaayo ang kahimtangan paagi sa paghatag sang praktikal nga paghanas nga kinahanglan sa industriya.
