Ginpahayag sang Department of Migrant Workers (DMW) ang pagpabaskog sa bilateral labor relation sini sa pungsod sang Finland pinaagi sa isa ka bag-o nga kasugtanan nga nagatuyo nga masiguro ang ‘makatarungan, etikal, kag sustainable nga working conditions’ para sa mga skilled nga Filipino workers.
Ang Joint Declaration of Intent nga ginpermahan nanday DMW Secretary Hans Leo Cacdac kag Finland’s Economic Affairs and Employment Minister Arto Olavi Satonen ang nakatutok sa pagpaayo sang labor mobility sang mga Filipino kag kooperasyon sa tunga sang duwa ka pungsod.
Gintukod sang kasugtanan ang isa ka komite nga ginakabug-usan sang mga opisyal gikan sa pareho nga pungsod agud mapaayo ang mga proseso sa pag-recruit, integrasyon sang mga mamumugon, kag kabug-usan nga transparency sa proseso sang employment. Ginsambit ni Cacdac nga ang relasyon sang mga mamumugon nga Pilipino kag mga employer sa Finland ang masami nga maayo kag madamo sa mga Filipino workers didto nga nakaeksperyensya sang maayo nga kondisyon sang kabuhi kag trabaho.
Gintuad ni Finland Economic Affairs Minister Satonen nga sa karon may 2,000 ka mamumugon nga Pilipino sa Finland ang tuman nga nalipay sa ila nga work performance.
Luyag sang Finland nga palaparon pa ang pagkuha sang mga Pilipino nga mamumugon sa mga sektor sang healthcare, services, tourism, kag information technolog kun sa diin magalab-ot sa €1,600 (Euro) ukon P96,000 ang kada bulan nga sweldo, nga may average nga wages nga €3,500 (Euro) ukon kabaylo sang P211,000 kada bulan.
Samtang suno sa datos sang DMW, yara sa 5,000 tubtob 6,000 nga mga Pilipino ang nagapuyo sa Finland nga kadam-an mga Overseas Filipino workers (OFWs).
