Ginalauman ang daku nga pagsaka sa presyo sang mga produktong petrolyo sa masunod nga semana.
Sa forecast sang Department of Energy (DOE), ang presyo sang gasolina ang magasaka sang P1.10 tubtob P1.40 kada litro.
Yara sa P1.70 tubtob P1.90 kada litro naman ang posible nga dugang sa presyo sang diesel kag P1.10 tubtob vP1.20 kada litro sa kerosene.
Suno kay DOE Oil Industry Management Bureau Director III Rodela Romero, ang pagbulubanta ang base sa four-day international trading.
Ginpahayag ni Romero nga nagtaas ang presyo sang langis sa nakaligad nga apat ka adlaw bangud ginalauman nga buhinan sang bagyo ang output sang United States sa Gulf of Mexico, ginaatrasar sang OPEC+ ang plano nga dugangan ang produksiyon sa Disyembre kag plano sang US Federal Reserve nga magpatuman sang panibag-o nga interest rate cut.
Suno kay Romero, ang iban pa nga contributing factors amu ang paghina sang piso, ang premium nga gindugang sa pagbakal sang mga produktong petrolyo kag ang freight cost.
Ang mga kompanya sang langis ang kinaandan na nga nagaanunsiyo sang price adjustments kada Lunes nga ila naman gilayon nga ginapatuman pagka-aga.
Sadtong nakaligad nga Martes, Nobyembre 5, ang presyo sang gasolina ang nagnubo sang P0.10 kada litro.
Nagtaas naman sang P0.75 ang presyo sang kada litro sang diesel kag P0.50 kada litro sa kerosene.
