Nagpatawag sang Provincial Response Cluster si Pangasinan Governor kag PDRRMC Chairman Ramon “Mon-Mon” Guico III kasunod sang opisyal nga pagdeklarar sang State of Calamity sa probinsya bangud sang malapnagon kag mabaskog nga pagbaha.
Ginpahayag ni Governor Guico nga prayoridad sang provincial government ang madasig nga pag-rescue sa mga residente nga nagakinahanglan sang bulig, lakip na ang pagpadala sang kinahanglanon nga suporta sa mga pamilya nga yara subong sa mga evacuation center.
Base sa pinakalatest nga report sang mga otoridad, naglab-ot na sa kapin 1.2 milyon ka indibidwal ang naapektuhan sang kalamidad sa bug-os nga probinsya, samtang 28 ka munisipalidad kag apat ka syudad ang direkta nga naapektuhan sang malain nga panahon.
Sa subong, 213 ka barangay halin sa 15 ka munisipalidad ang lubog sa baha, samtang ginabulubanta nga 2,700 ka pamilya ukon malapit 8,000 ka indibidwal ang temporaryo nga nagapabilin sa mga evacuation center.
Padayon naman nga ginabantayan sang mga response team ang Sinocalan kag Marusay River, pati na ang iban pa nga mga suba nga yara sa kritikal nga lebel sa central kag western nga bahin sang Pangasinan.
Nagpawagan man ang gobernador sa mga residente nga nagaestar sa mga manubo nga lugar nga indi magduhaduha sa pag evacuate kag gilayon nga makig-angut sa mga otoridad kun kinahanglan.
Ginsiguro naman ni Guico nga magapadayon ang relief operations kag suporta sang provincial government agud madasig ang pagbangon sang mga komunidad nga naapektuhan sang pagbaha.
