Nagpanagtag ang Department of Social Welfare and Development (DSWD) sang tag-₱10,000 nga cash assistance sa 1,462 ka vendors sa Baclaran, Parañaque City nga naapektuhan sang mga security measures nga ginpatuman may kaangtanan sa ASEAN Summit 2026.
Luwas sa pinansyal nga bulig sa idalom sang Assistance to Individuals in Crisis Situation (AICS) Program, nagpanagtag man ang ahensya sang family food packs para sa mga vendors kag ila pamilya.
Nagpangayo naman sang pasaylo si DSWD Secretary Rex Gatchalian sa mga vendors kag magagmay nga negosyante nga temporaryo nga napunggan ang ila pagpangabuhi bangud sa mga pagpanghanda para sa seguridad sang mga lider nga magatambong sa ASEAN Summit.
Suno kay Gatchalian, paagi sa nasambit nga bulig, nagalaum ang ahensya nga bisan paano mabaylohan ang kita sang mga vendors nga temporaryo nga nadulaan sang pangabuhian.
Samtang, target man sang DSWD nga magpanagtag sang pareho nga ayuda sa ginabanta nga 700 tubtob 800 ka vendors sa bahin sang Pasay City buwas, Nobyembre 13.
Ginpasiguro man sang secretary nga makig-angut sila sa mga lokal nga gobyerno agud mahibaluan kun may yara pa sang iban nga vendors nga nagakinahanglan sang dugang nga bulig.
