ROXAS CITY – Masobra sa 300 ka mga pamilya na ang ginpa-evacuate gikan sa mga coastal areas sa banwa sang Pilar kag Panay Capiz bangud sa padayon nga pagpanalasa sang bagyo nga Tisoy sa probinsiya.
Sa interview sang Bombo Radyo kay Pilar Mayor Arnold Perez, ginpahayag sini nga mas o menus isa ka libo ka mga indibidwal ang ila nga ginpabiya sa mga coastal barangays sa banwa sang Pilar bangud sa epekto nga dala sang nasambit nga bagyo.
Ang nasambit nga mga bakwit ang gikan sa siyam ka mga kabaranggayan sa banwa sang Pilar kag sa karon yara sa mga eskwelahan nga nagaserbi sa evacuation centers kag ang iban naman ang yara sa housing units sang National Housing Authority (NHA).
Ginaprepahan naman sang lokal nga gobyerno sang banwa sang Pilar ang ayuda nga igahatag para sa mga residente nga maapektuhan sang bagyo nga Tisoy.
Samtang, suno naman kay Mr. Jessie Baes, Municipal Disaster Risk Reduction and Management Officer sang banwa sang Panay, masobra sa 60 ka pamilya naman ang ginpa-evacuate gikan sa coastal barangays sa nasambit nga banwa.
Ang nasambit nga mga evacuees ang nagapabilin karon sa Sta. Monica Church, Capiz Archdiocesan Social Action Center kag pila ka mga eskwelahan nga nagaserbi nga evacuation centers.
