ROXAS CITY – Dakop ang 43 ka mga indibidwal matapos nga nadakpan sang mga katapo sang Coronavirus Disease Inter Agency Task Force (COVID-19 Task Force) nga wala nagasuksok sang facemask kag faceshield sa Teodoro Arcenas Trade Center ukon TATC, Barangay 8, Roxas City.
Ini ang ginpahayag ni Helouise Mendoza ang Market Administrator sang TATC sang mainterview sang Bombo Radyo.
Suno kay Mendoza nga kadam-an sa mga nagkaladakpan ang wala nagasuksok sang maayo sang ila nga facemask kag faceshield, ginatago ang faceshield sa bag kag iban sa ila wala sang dala nga faceshield.
Mahibaluan nga nagsugod na subong nga adlaw sang Lunes, Setyembre 28 ang ordinansa ukon mandatoryo nga pagsuksuk sang facemask kag faceshield sa siyudad.
Nagpanugyan naman si Mendoza nga may yara sang multa ang sin-o man nga madakpan nga wala nagasunod sa nasambit nga ordinansa.
Ang madakpan ang magabayad sang P500 nga multa para sa first offense, P3,000 para sa second offense kag P5,000 para sa third offense.
Kun wala sang kuwarta ang madakpan,mahimo man nga magbayad pinaagi sa community service.
Samtang, ginpahayag naman ni Lorelie Suelo sang Roxas City Crisis Center nga ang tanan nga madakpan ang dal-on sa amo nga talatapan kag ihatag ang mga nagakaigo nga penalidad sa mga violators kapareho sang pagsukot sang multa kag pagpatigayon sang community service.
Sa karon, may yara na sang kabug-usan nga 1,720 ka mga violators na ang nadakpan sa siyudad nga nagalapas sa mga ginapatuman nga mga health protocols humalin sang bulan sang Abril tubtob subong nga Setyembre.
